NOTA DE PRENSA
17 de outubro, Día Internacional pola
Erradicación da Pobreza
O empoderamento, clave na erradicación da
pobreza
Pontevedra, 17 de outubro de 2012.- A asociación Boa Vida Inclusión Social Activa
quere conmemorar o Día Internacional pola Erradicación da Pobreza que ten lugar
hoxe, cunha charla-coloquio, ás 18:30 horas na Biblioteca Pública de
Pontevedra, na que participarán entre outros, o xornalista radiofónico e
presidente de Agareso, Juan de Sola, e o cantante Gustavo Almeida, e que xirará
ao redor do empoderamento das persoas como clave para erradicar a pobreza.
Segundo datos de EAPN- Galicia, na nosa comunidade 648.975 persoas
viven na pobreza, o que supón un incremento de 50.000 persoas en relación co
ano anterior. É especialmente grave a situación de 111.305 persoas que
sofren privación material severa, o que sitúa a Galicia por encima da media
nacional, cun 4,1% de poboación afectada. Ademais, a quinta parte dos menores
galegos viven nun fogar pobre, o que supón que máis de 82.100 nenos e nenas
menores de idade forman parte dunha familia que vive baixo o limiar da pobreza.
A extrema pobreza perpetúa un círculo de discriminación que
ameaza os dereitos das persoas, por iso, dende a asociación Boa Vida queremos facer
fincapé nun dos dereitos fundamentais, como é o da participación e o
empoderamento, tendo en conta tamén, que este ano, a ONU dedica esta data á
promoción do empoderamento e a consolidación da paz.
Dende Boa Vida consideramos que o empoderamento ten un valor especial na
voz, por iso un dos
participantes na charla-coloquio será o xornalista radiofónico e presidente da
Asociación Galega de Reporteiros Solidarios (Agareso), Juan de Sola,
quen explicará como se lle da voz á pobreza dende a radio. Ademais,
presentaremos a gravación dunha conversa entre os nosos socios coa que
pretendemos darlle voz ás persoas en situación de pobreza.
Remataremos
o acto coa música de Gustavo Almeida, quen interpretará o seu tema ‘De
frente’. Unha peza que pretende dar esperanza nestes momentos tan complexos
e difíciles, nos que queremos lembrar que a crise non é froito do exceso de
gasto público, senón da especulación e o malgasto do enramado bancario e
financeiro. Así mesmo, dende a organización consideramos que a actual redución
de apoio ás persoas desfavorecidas aumenta o tempo de permanencia na crise
económica e condénanos a vivir e morrer na pobreza e fora dos sistemas de
protección social acadados con tanto esforzo.
Ao
final do acto terá lugar un ágape entre os asistentes ao mesmo.
Axuntamos á nota de prensa a gravación da conversa entre os nosos socios, para que os medios
de comunicación poidan reproducir e facer chegar a voz de persoas en situación
de pobreza á cidadanía.
Para máis información:
Boa Vida Inclusión Social Activa
Teresa Patiño e Miguel Luque (686 182 963)
Telf. asociación: 668 862 139
No hay comentarios:
Publicar un comentario